BAU ბათუმის საერთაშორისო უნივერსიტეტში ორი ახალი ქართულენოვანი სამაგისტრო პროგრამის - განათლების ადმინისტრირებისა და საზოგადოებრივი ჯანდაცვისა და პოლიტიკის პრეზენტაცია გაიმართა, რომელსაც პროგრამაში ჩართული პირები ესწრებოდნენ.
ახალი სამაგისტრო პროგრამები მნიშვნელოვან ცვლილებებსა და ინოვაციებს სთავაზობს განათლებისა და ჯანდაცვის სფეროს, აერთიანებს თანამედროვე მიდგომებს, კვლევებზე დაფუძნებულ სწავლებას და პრაქტიკულ გამოცდილებას.
განათლების ადმინისტრირების სამაგისტრო პროგრამა შექმნილია მომავალი ლიდერების მოსამზადებლად, რომლებიც განათლების სფეროში თანამედროვე მენეჯმენტისა და ადმინისტრირების უნარებით იქნებიან აღჭურვილნი. საზოგადოებრივი ჯანდაცვა და პოლიტიკა კი გლობალური ჯანმრთელობის გამოწვევების პასუხია, პროგრამა მიზნად ისახავს საზოგადოებრივი ჯანდაცვის გაუმჯობესებას, ჯანდაცვის პოლიტიკის ჩამოყალიბებასა და მისი ეფექტური განხორციელების ხელშეწყობას.
შეხვედრაზე წარმოდგენილი იყო პროგრამების უპირატესობები, ინოვაციური მიდგომები და უნივერსიტეტის ხედვა.
BAU ბათუმის საერთაშორისო უნივერსიტეტი კვლავ აგრძელებს განათლების ხარისხის გაუმჯობესებას და სტუდენტებისთვის ახალი შესაძლებლობების შექმნას, რაც მათ პროფესიულ განვითარებაში მნიშვნელოვან როლს შეასრულებს.